არქიტექტურა, არქეოლოგია კულტურა

გერმანელთა ისტორიული დასახლებები

2017 წელს საქართელოში პირველი გერმანული კოლონიების (შვაბური დასახლებების) დაფუძნებიდან 200 წელი შესრულდა. ამასთან დაკავშირებით UNESCO-მ სამხრეთ კავკასიაში, კერძოდ, საქართველოსა და აზერბაიჯანში 2017-2018 წლები საიუბილეო თარიღად გამოაცხადა.

საქართველოში გერმანელთა ჩამოსვლა რუსეთის იმპერიის ხელშეწყობით 1817 წლიდან იწყება. მათი უდიდესი ნაწილი ვჲურტემბერგელი შვაბები იყვნენ, რომლებმაც კოლონია დაარსეს ქვემო ქართლში, სოხუმსა და თბილისთან ახლოს, აგრეთვე დღევანდელ აზერბაიჯანის ტერიტორიაზე.

მეორე მსოფლიო ომის დაწყებისთანავე სტალინის ბრძანებით საქართველოდან 23 580 გერმანელი ყაზახეთში გადაასახლეს. რეპრესიების დასრულების შემდეგ გერმანელების მცირე ჯგუფი საქართველოში დაბრუნდა და 1956 წელს გარდაბნის რაიონში კოლონია ნოი-ბოტანიკა დააარსა.

გერმანელთა კოლონიები დღემდე შემოგვრჩა და ყველა მათგანი შეუცვლელი ღირებულების მემკვიდრეობას წარმოადგენს მულტიკულტურული და მრავალეთნიკური საქართველოსთვის.

Image may contain: house, sky, tree, plant and outdoor

საქართველოს კულტურული მემკვიდრეობის დაცვის ეროვნული სააგენტო მეორე წელია ახორციელებს საქართველოს ტერიტორიაზე არსებული გერმანული კოლონიების ისტორიული დასახლებების, მათი ურბანული ქსოვილის, საკულტო და საერო, მათ შორის საზოგადოებრივი, ინდუსტრიული თუ საცხოვრებელი არქიტექტურის უნიკალური ნიმუშების კვლევა-ინვენტარიზაციის ფართომასშტაბიან პროექტს. პროექტის მთავარი პარტნიორია „სამხრეთ კავკასიაში გერმანული კულტურული მემკვიდრეობის დაცვის კავშირი“.

2016 წელს ჩატარდა თეთრიწყაროს, წალკის, მანეულისა და დმანისის მუნიციპალიტეტებში, ასევე თბილისში დიდუბის რაიონის არეალში არსებული ისტორიული ნაგებობების კვლევა-დოკუმენტირება.

Image may contain: outdoor

2017 წელს ინვენტარიზაცია ჩატარდა მარიენფელდში, პეტერსდორფსა და ფროიდენტალში (ახლანდელი სართიჭალა, გარდაბნის მუნიციპალიტეტი), ნოიტიფლისში (დღევანდელი დავით აღმაშენებლის გამზირი და მისი მიმდებარე ქუჩები) და ნოიბოტანიკაში (გარდაბნის მუნიციპალიტეტი, სოფ. კალინინოს თემი ბოტანიკა).

ვიზუალური მასალის მოწოდებისათვის დიდ მადლობას ვუხდით საქართველოს კულტურული მემკვიდრეობის დაცვის ეროვნულ სააგენტოს და გ. ჩუბინაშვილის სახელობის ქართული ხელოვნების ისტორიის და ძეგლთა დაცვის კვლევის ეროვნულ ცენტრს.

კომენტარები

კომენტარი