კულტურა

TBILISI OPEN AIR 2017- 16-18 ივნისს გაიმართება

ყოველწლიური მუსიკალური ფესტივალი „TBILISI OPEN AIR“ წელს 16 – 18 ივნისს გაიმართება. პროექტს ტრადიციულად „ალთერ ვიჟენ“ ჯგუფი ატარებს.

მსმენელის წინაშე წელს ARCHIVE, ANATHEMA, LENINGRAD, SEVDALIZA, ALEX.DO, OXIA, SOFT EJECT, YOUNG GEORGIAN LOLITAZ და კიდევ 20-ზე მეტი ქართველი არტისტი წარსდგება.

ორგანიზატორების ინფორმაციით, “TBILISI OPEN AIR 2017” – 16, 17 და 18 ივნისს, ფესტივალის მიმდინარე მისამართზე – ლისის ტბიდან ორ კილომეტრში, ლისი ვანდერლენდში გაიმართება. სამი დღის განმავლობაში ფესტივალი სტუმრებს სამ განსხვავებულ სცენას, შეუზღუდავ მუსიკალურ ჟღერადობასა და უამრავ სახალისო და გასართობ აქტივობას შესთავაზებს. ფესტივალზე მოსულ მსმენელს “TBILISI OPEN AIR 2017” საფესტივალო ქალაქში სრულად გამართულ ინფრასტრუქტურას დაახვედრებს.

„ინტერესი ფესტივალის მიმართ წელს, ისევე როგორც წინა წლებში, ძალიან დიდია, ტურისტული ნაკადის შემოსვლა დაგეგმილია შემდეგი მეზობელი ქვეყნებიდან: აზერბაიჯანი, სომხეთი, ირანი, უკრაინა, რუსეთი და თურქეთი“, – აცხადებენ ორგანიზატორები.
ბილეთების გაყიდვა დაიწყება 12 აპრილს ონლაინ – tkt.ge-ზე, ასევე სპორტის სასახლის წინ განთავსებულ ფესტივალის სალაროსა და ფილარმონიის სალაროებში. პირველ ეტაპზე, 12 აპრილიდან 28 აპრილის ჩათვლით გაიყიდება მხოლოდ ლიმიტირებული 1,500 ცალი აბონიმენტი, რომლის ფასი 100 ლარია.

როგორც საორგანიზაციო ჯგუფის წარმომადგენლები აცხადებენ, “TBILISI OPEN AIR 2017”-ის მეგობარი კომპანიაა – „თიბისი ბანკი“, რომელიც ფესტივალის სტუმრებს სპეციალურ ფასდაკლებას სთავაზობს. „თიბისი ბანკის“ ნებისმიერი ბარათით ბილეთის ყიდვის შემთხვევაში იმოქმედებს 20%-იანი cashback სისტემა, რაც იმას ნიშნავს, რომ აბონიმენტის შეძენა 100 ლარის ნაცვლად, 80 ლარად იქნება შესაძლებელი. 29 აპრილიდან, აბონიმენტების გარდა, დაიწყება ყოველდღიური ბილეთების გაყიდვაც. აბონიმენტის საბოლოო ფასი კი 150 ლარი გახდება.

„TBILISI OPEN AIR” ამიერკავკასიის ყველაზე დიდი ყოველწლიური მუსიკალური ფესტივალია, რომელიც პირველად 2009 წელს ჩატარდა. ფესტივალი წლიდან წლამდე ვითარდება და უფრო საინტერესო ხდება, როგორც ადგილობრივი, ისე უცხოელი მსმენელისთვის. ფესტივალს ყოველწლიურად ესწრება 50 000-მდე ადამიანი, მათ შორის 5 000-მდე ტურისტი“, – აცხადებენ „TBILISI OPEN AIR“-ის ორგანიზატორები.

კომენტარები

კომენტარი